Equity Fund Kya Hai aur Isme Nivesh Kaise Kare?

Kya aap jaante hain ki Equity Fund kya hai? Aaj bahut se log is dushvaar mein hain ki Equity Funds kya hote hain. Kisi bhi website par in funds se judi koi thos jaankari uplabdh nahi hai. Isi liye, aaj hum aapke liye equity funds se judi ye post laaye hain. Hamari post aapke equity funds se jude saare sawalon ke jawab degi.

Hum apni website par aapko mutual funds ke baare mein pehle bhi bata chuke hain ki ye mutual funds kya hain aur kis prakar se kaam karte hain. To jaise ki humne pehle bhi bataya ki mutual funds ko hum 3 prakar se baant sakte hain: debt, hybrid, aur teesra equity.

Equity Fund Kya Hai?

Equity Fund mutual fund ki wo scheme hai, jo khaaskar shares/company ke stocks mein nivesh karti hai. Inhe Growth Fund (Vriddhi Fund) bhi kehte hain. In teenon funds mein sabse zyada lokpriya equity funds ko mana jata hai.

Equity Fund Kya Hota Hai aur Iske Kya Labh Hain?

Equity Fund mein nivesh ka zyada hissa share baazaron mein nivesh ke liye upyog kiya jata hai. Ye mutual funds un niveshakon ke liye faaydemand ho sakte hain jo ki share baazar mein jokhim uthane ke liye tayar rehte hain. Kyunki agar equity fund mein zyada munafa hai to iske sath hi jokhim bhi utna hi zyada hota hai.

Equity Fund Ke Prakar

Equity Funds ka vargikaran kai prakar se kiya ja sakta hai. Equity funds mukhya roop se Large Cap, Mid Cap, aur Small Cap mein bante hain. Par inke alawa bhi kai aur funds hote hain jaise Diversified Funds aur Sector Funds. Aaiye jaante hain inke baare mein:

1. Large Cap Equity Funds:

Large Cap Equity Funds ko zyada se zyada badi companies mein hi nivesh kiya jata hai. Ye companies apne kshetra mein acchi tarah se sthapit hoti hain aur inke doobne ki sambhavana kam hoti hai. Isi wajah se Large Cap companies ko nivesh ke liye surakshit mana jata hai.

2. Mid Cap Equity Funds:

Mid Cap Equity Funds mein zyadatar madhyam aakar ki companies mein hi nivesh kiya jata hai. In companies mein nivesh mein kuch jokhim shamil hota hai kyunki ho sakta hai ki company apni purn kshamata ke anusaar pradarshan na kar paye. Par agar company aage chal kar vikasit hoti hai to aapko kaafi munafa ho sakta hai.

3. Small Cap Equity Funds:

Small Cap Equity Funds ke madhyam se choti companies ke stocks mein nivesh kiya jata hai. Inmein nivesh karna zyadatar jokhim bhara hota hai kyunki in companies ke baare mein bahut kam jaankari uplabdh hoti hai. Par yadi company viksit ho jaati hai to aapko kaafi munafa ho sakta hai.

4. Sector Funds:

Sector Funds ka matlab hai kisi vishesh kshetra ki companies mein nivesh. Yeh funds sirf kisi ek kshetra ki companies ke shares mein nivesh karte hain, jise real estate ya technology sector. Is tarah ke funds mein nivesh karna bahut jokhim bhara hota hai.

5. ELSS (Equity Linked Saving Scheme) ya Tax Saving Funds:

ELSS funds niveshak ko tax chhoot ka faayda dete hain. In funds mein nivesh kiye gaye 1.5 lakh rupaye tak ki raashi tax mein chhoot ke liye yogya hoti hai. Inka lock-in period teen saal ka hota hai.

6. Diversified Equity Funds:

Diversified Equity Funds sabhi kshetron mein nivesh karte hain, matlab yeh funds kisi vishesh prakar ke shares mein nivesh karne ke liye seemit nahi hote. Yeh funds badi, madhyam, aur chhoti companies mein nivesh kar sakte hain.

Equity Funds Se Labh

Equity Funds se bhi wahi saare labh prapt hote hain jo humein mutual funds se hote hain. Jaise nivesh karne ki aasani, paaradarshita, kam jokhim, etc. Equity fund mein nivesh ka mukhya labh yeh hai ki aapko shares aur kshetron mein nivesh karne ki chinta nahi karni padti, yeh sab kaam fund manager karta hai.

Equity Funds Mein Nivesh Kaise Kare

Equity Funds mein nivesh karna bahut hi aasaan hota hai. Iske liye aap kisi broker ya agent ka istemal kar sakte hain ya khud se online nivesh shuru kar sakte hain. Agar aap bazaar mein naye hain to broker ki madad lena behtar hoga.

Online Nivesh

Online ya direct nivesh mein aap apni gatividhiyon ke khud hi zimmedar hote hain. Ismein kisi broker ya agent ki madad nahi li jaati. Iske liye aap companies jaise Reliance ke mutual funds ki website par jaakar account bana sakte hain aur nivesh shuru kar sakte hain.

Invest Karne Ke Liye Top Equity Funds

Bharat mein bahut si companies ke equity funds uplabdh hain. Top 5 funds jo aapke nivesh ke liye faaydemanad ho sakte hain:

1. SBI BlueChip Fund-Regular (D)
2. Birla SL Frontline Equity Fund (D)
3. Franklin India Prime Plus Fund (D)
4. Meera Asset Opportunities Fund-Regular (D)
5. HDFC Mid Cap Fund (D)

Safalta Se Nivesh Karne Ke Tips

Safalta se nivesh karne ke liye kaafi research karni padti hai. Kisi bhi company mein nivesh se pehle us company ki arthik sthiti ki poori jaankari lein aur jab aap puri tarah se santusht ho jaayein tabhi equity funds mein nivesh karein.

Equity Mutual Funds Ka Risk

Equity mutual funds share bazaar ke utar-chadhav ke aadhar par hain aur niveshak ko salaah di jaati hai ki nivesh karne se pehle puri jaanch zaroor karein.

Aaj Aapne Kya Seekha

Mujhe ummid hai ki aapko equity fund kya hai ke baare mein samajh aa gaya hoga. Mera aapse nivedan hai ki aap is jaankari ko apne aas-padosh, rishtedaron, apne mitron mein share karein jisse ki hum sab ke beech jaagrookta hogi aur sabko faayda hoga.

Agar aapko is post mein koi kami nazar aaye to kripya comment box mein apni rai dein aur humein us kami ko sudharne mein madad karein. Dhanyawaad.