Blogger Blog mein Multiple Author kaise Add karein

Blogger blog mein multiple author kaise add karein, blogger blog ko dusre email id pe kaise transfer karein – yeh sawal hamare ek reader ne poocha tha. To aaj hum usi vishay par baat karenge. Jo WordPress pe apna blog banaye hain, unhein yeh ehsaas zarur hua hoga ke yeh blogger blog se kitna behtar hai.

Main yeh nahi keh raha ke blogger blog accha nahi hai, par aise kuch features WordPress pe hain jo, aapko yahan dekhne ko nahi milenge. Agar aap apne blog ko poori tarah se control karna chahte hain, to aapke liye WordPress hi best platform hai. Agar aap phir bhi confused hain ke dono mein se kaunsa chunen, to Blogger vs WordPress ko padna na bhulein.

Blog mein Author kaise Add karein

Ek blog mein jo post likh kar publish karta hai, hum use author kehte hain. Ek author apne publish kiye gaye post ko edit bhi kar sakta hai. Agar aap multiple author wala blog banana chahte hain to main aapko WordPress hi recommend karunga. Par aap apne blogger blog pe bhi iska laabh utha sakte hain. Aap ek author add karne ke baad chahe to use apne blog ka admin bhi bana sakte hain.

Blogger blog mein ek author bas khud ke post publish aur edit kar sakta hai. Wo dusre author ka post edit nahi kar sakta, par unhein dekh sakta hai. Agar aap use admin bana dete hain to aap jo kar sakte hain wo bhi wohi kar sakega. To chaliye jaan lete hain ke blogger blog mein multiple author kaise add karein.

How to Add Multiple Authors in Blogger Blog

Yeh bahut hi simple sa procedure hai. Iske liye aapko do gmail id chahiye. Ek jo aapke blogger blog ke admin ho aur dusra jise aap author mein add karna chahte hain.

Steps:

1. Blogger.com pe jayiye aur apne email id aur password de kar login kariye.

2. Uske baad aapko aapke blog ka link dikhai dega. Wahan pe click kariye.

3. Ab aapko Settings >> Basic >> Permissions mein jana hai.

4. Yahan aapko aapka email id dikhega aur uske niche +add authors link hoga. Use click kariye.

5. Ab aapko jin jin email ids ko author ke hisaab se add karna hai unhein type kariye aur Invite authors button pe click kariye.

6. Aap jinka email id diye honge, unke Gmail account pe ek invitation mail jayega. Aapko email pe diya gaya Accept invitation button pe click karke use accept karna hai.

7. Accept karne ke baad wo user ek author ke taur pe aapke blogger blog pe add ho jayega. Agar aapko use admin banana hai to Settings >> Basic >> Permissions pe ja kar use Author se Admin ko change kar dijiye.

Aaj Aapne Kya Seekha

Aasha karta hoon aapko pata chal gaya hoga ke blogger blog pe multiple author kaise add kiya jata hai. Aap ek author ko admin bana ke apna blog use transfer bhi kar sakte hain. Agar aap apna blog bechna chahte hain to aap isi procedure se wo kar sakte hain. Agar aapke mann mein abhi bhi kuch doubts hain to aap niche comments mein poochh sakte hain.